美心西餅 (太古站)

Open Now

Now Closed

見到廣告介紹美心餅店推出咗脆脆系列，有朱古力脆脆及芒果脆脆。兩樣都想試，奈何家中人口不多，無可能買兩個蛋糕返屋企食，於是決定買鮮果脆脆杯試吓，因為一樣有齊朱古力同埋芒果味道，加上美心做緊甜品買4 送1 優惠，每杯 $15, 咁就要5 杯啦。買嘅時候，個店員仲提醒我回家後記得放入雪柜內，很細心。飯後急不及待要拿出來吃，兩款甜品嘅賣相都非常美觀，看得人心花怒放。首先試咗個芒果脆脆杯，第一層嘅芒果粒頗多，雖然有幾粒微酸，但也着實不賴。老公話中間呈啫喱狀嘅黄色奶凍最好味，甜度適中；最下層係朱古力蛋糕，朱古力味好香，杯底仲有一層薄薄嘅脆脆，有啲似焦糖，好脆口，非常美味。至於個朱古力脆脆，面頭有三粒士多啤梨，啲士多啤梨都唔錯，夠甜夠大粒。士多啤梨下就舖咗一層朱古力薄脆，跟住嗰層係朱古力慕絲，而最下層就係混入咗啫喱嘅朱古力蛋糕。唔知啲朱古力係咪好似聖安娜嘅 Chocolate Truffle 用比利時朱古力，不過朱古力味都幾濃，但如果兩款脆脆比較，連我這個朱古力怪都不得不認個芒果脆脆做得着實比朱古力出色。 嗜甜嘅人，吃完甜品，總有一種幸福的感覺，超正。