Asiri

Open Now

Now Closed

作為呢頭嘅上班一族, 已經幾乎試勻晒成條海光街嘅食店, 呢間Asir雖然唔算好大, 但座位擺放特別闊落, 喺呢度可以搵到間坐得咁舒服嘅餐廳實在難得。坐得舒適之餘呢度仲好有特色, 特色在...雖然餐廳由日本人主理, 但普遍嘅壽司、刺身、串燒、 爐端燒、拉麵...佢通通都無！呢度最出名嘅係北海道湯咖喱！雜菜湯咖哩 $108 橙紅色湯底十分醒目, 雖然叫做湯咖哩但原來湯中並冇咖哩成分, 隨餐會附上一支咖喱粉, 可按個人口味加減。不過我就覺得唔加已經好正！湯底無加入厚膩椰奶, 香草味特出, 湯清不稠, 加上多種蔬菜, 清甜中帶點微酸, 健康怡人, 飲晒啲湯都無負擔。呢道菜真係完全顛覆我對咖喱嘅原有印象！根室吉列豬扒飯 $118 自家製豬扒配上特製醬汁, 豬扒金黃酥脆, 醬汁有點濃。 伴上幾款唔同顏色嘅蔬菜, 健康又美味。廣島炸蠔 $60蠔肉偏細, 炸粉有點厚, 不過勝在蠔味都幾新鮮。跟餐仲有北海道薯仔沙律, 份量剛好。