七重天餐廳

Open Now

Now Closed

係鰂魚涌嘅食lunch ，就好似進入到第三世界嘅災難現場，又或者末日既喪屍片咁，一隻二隻飢民湧入唔同既餐廳，跑慢啲就要等位，分分鐘等到lunch hour 完都未食到飯。同事介紹呢間餐廳，lunch hour 都唔算太多人，係門口等一陣就已經入得，侍應事先係門口幫我哋落單，所以一坐低已經有湯飲。特別之處係一般餐廳通常提供紅湯同白湯，但呢度竟然有洋蔥湯。洋蔥湯配上香脆既蒜蓉包，絕對係perfect match， 洋蔥湯非常之清爽， 亦有好多洋蔥絲，食到有少少雞湯做膽， 加上煲咗好耐既洋蔥，非常入味，清得嚟好溫暖順口，冬天超啱飲。而蒜蓉包既外皮好脆， 牛油味同蒜蓉味亦非常足夠， 外脆內軟，唔會乾曬，點埋湯食真係超正。至於西冷扒亦都唔錯，煎得幾香，但店內提供既餐刀就唔太利，需要額外問店員索取牛扒刀。 同埋黑椒汁就多咗啲，有少少遮咗個牛扒嘅味道，係 典型嘅港式西餐，但意粉就烚得比較耐，比較淋身，同埋係預先煮起，所以有啲凍。不過午餐時間，廚房比較繁忙，喺情有可原嘅，六十蚊包嘢飲，不過不失啦。