天海 (Closed)

朋友推薦呢間日本師傅嘅天婦羅專門店，於是平日午餐時間組隊嘗鮮。店舖11點半開，12點朋友A早放飯先黎排隊，但由於店面太細只有10座，加上係名店，等到12點7先成功入座。正值下天店外又冇瓦遮頭，等候時間相當難挨。第一次試食不想煩惱直接叫menu粉紅色highlight推薦嘅海鮮天丼定食。定食配有前菜，湯及凍抹茶一杯。前菜不過不失。湯有些少可以拉絲嘅不明蔬菜，幾好飲。海鮮天丼定食入面天婦羅以好味程度排名分先後為鰻魚、帶子、烏賊、帆立、白味魚、蟹、野菜、流心蛋。個鰻魚天婦羅好食到我後悔冇叫350蚊嘅鰻天重定食。排隊時聽一位自稱食左3年嘅熟客老怕話，佢呢度menu定時轉，可能過一排未必有鰻魚。正如一開始最好食嘅豬扒後來已消失於menu。如果大家本身冇preference唔好諗太多直接叫鰻天重定食啦。蛋排包尾唔係佢唔好食，純粹食落覺得天婦羅蛋呢件事好微妙而且筷子一夾蛋太滑就天婦羅皮同蛋分離。所有天婦羅皮都好薄咬落又唔會直接覺得熱氣，同出面完全唔同level，不過店舖所有天婦羅都已附一個微甜嘅汁，抗拒甜食嘅朋友基本上可以直接pass呢間名店。300蚊，日本師傅，日本材料，日本味道，算不過不失配得住