一風堂 (德福廣場) (Closed)

夜晚約左朋友食晚飯，打算食日式，就行左去德福呢間一風堂。一入去見環境裝修唔錯，空間都幾大，中間有一張長枱，左右兩邊有就卡位座位。當時時間尚早，空位算多，我同朋友兩個就被安排坐係近門口既卡位。睇完餐牌，我點左一個鰻魚石頭鍋飯，朋友就點左一碗橫濱家系豚骨拉麵。原來個鰻魚石頭鍋飯係迷你版既，比起一般見到既石頭鍋飯細一半。鰻魚上有芥末同紫菜，加上個醬汁，食落條鰻魚更好味。係石頭鍋上，啲飯、蛋同醬汁撈埋，飯味更香，仲有啲飯焦，唔錯。呢個飯量對我黎講足夠，對男生黎講，份量就略少了。朋友對於個拉麵算滿意，有兩片叉燒，一隻溏心蛋，麵質軟硬度適中，但湯底偏鹹。