Video
Read full review
2010-08-18
58 views
環境：（全晚播放住平井堅既歌，好啱我口味。）1) 兩層式設計：上層為散枱式，下層為私人房間式。概念好，不過有一點唔係好明，雖然有升降機，不過所有下層既顧客出入都必須經過上層上落樓梯，好似唔係好歡迎年紀大或行動唔方便既人士。（環境分被扣既主要原因）2) 上層個＂酒牆＂，如食評們post 嗰 d 相般咁靚。室內裝修以木為主，加上光線柔和，簡單得黎唔會老套，感覺好舒服。3) 我地一行七人，自知說話音量頗大，所以訂坐時要求有私人空間。我地被安排坐下層一間tatami房：雖然係唔洗跪嗰隻，不過我地係要爬入去既，同行既大部分為花甲長者，而且身材有返咁上下，所以坐得唔係好自然，更可以話係唔舒服。 4) 我地所有人都好欣賞個男女共用既洗手間，因為夠大，同埋個門鎖實在太別緻。相中係洗手間內嗰個門鎖，按紅鈕時門會自動鎖上，再按一下會解鎖，只要按下面既門制門就會自動打開，非常衛生方便。唯一問題係抽氣做得唔夠，越夜越焗，除左洗手間味，重有勁油煙味。（衛生分被扣原因）服務：態度誠懇有禮，唯獨人手及經驗不足。1) 下層伙計數目最多三位，好多時想加野食都搵唔到人。2) 因為當晚有位客人係敏感日本米酒既，所以喺電話訂
1) 兩層式設計：上層為散枱式，下層為私人房間式。概念好，不過有一點唔係好明，雖然有升降機，不過所有下層既顧客出入都必須經過上層上落樓梯，好似唔係好歡迎年紀大或行動唔方便既人士。（環境分被扣既主要原因）
2) 上層個＂酒牆＂，如食評們post 嗰 d 相般咁靚。室內裝修以木為主，加上光線柔和，簡單得黎唔會老套，感覺好舒服。
3) 我地一行七人，自知說話音量頗大，所以訂坐時要求有私人空間。我地被安排坐下層一間tatami房：雖然係唔洗跪嗰隻，不過我地係要爬入去既，同行既大部分為花甲長者，而且身材有返咁上下，所以坐得唔係好自然，更可以話係唔舒服。
4) 我地所有人都好欣賞個男女共用既洗手間，因為夠大，同埋個門鎖實在太別緻。相中係洗手間內嗰個門鎖，按紅鈕時門會自動鎖上，再按一下會解鎖，只要按下面既門制門就會自動打開，非常衛生方便。唯一問題係抽氣做得唔夠，越夜越焗，除左洗手間味，重有勁油煙味。（衛生分被扣原因）
服務：態度誠懇有禮，唯獨人手及經驗不足。
1) 下層伙計數目最多三位，好多時想加野食都搵唔到人。
2) 因為當晚有位客人係敏感日本米酒既，所以喺電話訂位時特地問餐廳有冇提供香檳，答案係冇，依位貴賓唯有自備香檳啦，開瓶費為 $ 100。問題一：餐廳收開瓶費係針對唔飲餐廳提供既酒既顧客。Toba個酒牌係冇香檳既，所以佢收我地兩支香檳既開瓶費實在有點不合理。問題二：開瓶費個名都講到好明，係餐廳幫我地開瓶啦，不過當晚枝香檳係我自己開既，想請問可謂開瓶費呢？其實收開瓶費好正常，因為餐廳都要賺錢，不過餐廳除左要提供唔同酒類比客人，至少也要為客人＂開瓶＂吧。（公平少少講句，伙計們並唔係偷懶唔做，而係根本冇人得閒做，所以服務分沒有嚴重被扣除）
3) 同行既客人全部為飲得之人（小弟只係旁觀者，睇佢地飲），所以特地帶左支1.8公升。因餐牌係有各款唔同大細種類既sake，所以佢收$100開瓶費我地冇異議。問題所在：我地飲酒既速度雖然算快，不過姐姐仔同哥哥仔既加酒速度就似乎太慢啦，我地d 杯同酒壺好多時都係吉既。見佢地走黎走去，真係好忙，所以只好怪佢地人手不足啦。
4) Tatami房既設計只有一個好細既門口，所以每當有食物到時我地都要幫姐姐仔擺放同清理，我地都好忙碌架。
味道：
雞泡魚乾：$48；暖暖地，唔硬唔乾唔靱，連味道都唔腥。甜甜地，咬落軟淋淋，而且唔黐牙，大家都讚好過好多日本餐廳。
酥炸雞腎：$38；新鮮熱辣，雖然顏色黑左少少，不過炸到好乾身，完全冇過熟。一口一粒，爽口無比唔油膩，鹽味調教得好好，送酒一流。咁正，我地當然玩encore 啦。必吃推介一。
炸雞軟骨：$38；雖然唔油，不過好乾，而且唔夠脆又唔夠熱，味道重好咸，同雞腎相比下真係差好遠。周街都有食，所以不吃也罷。
枝豆：$30；冇乜特色之餘，味道太淡。
炸腐皮溫泉蛋：$45；如所有食評們所說，正到暈，簡直色香味俱全！！！全場食到lam lam 脷。外層係超級鬆化既腐皮，乾爽香脆，包住半生熟既糖心溫泉蛋，好流心呀。必吃推介二。唔講真係唔知道，原來每件炸腐皮溫泉蛋入面係有兩隻蛋架。師傅要喺腐皮內先放蛋，再串住黎炸。為勉溫泉蛋過熟，烹調既時間要掌握得好好，一個非常新穎精彩既配撘。
池魚薄切：$148；池魚切得真係夠薄，賣相非常得。魚肉鮮甜，一d都唔腥；雖不可稱得上嫩滑，但絕對唔嚡。個酸汁教得好好，連個三層汁碟都好睇得。當晚既客人都讚不絕口。推介三。請留意，好多餐廳係連骨賣既，可以選擇煲魚骨湯或炸魚骨黎送酒；不過Toba個池魚骨係唔包既。
軟殼蟹牛油果卷：$120；味道其實唔錯，牛油果就好夠份量啦，不過唔係好夠蟹，好似食緊牛油果炸麵粉卷多d。軟殼蟹本身咁細隻，都好難怪佢既。
雞頸肉＂卜口＂（＂拖羅＂）：$18/串；肉質唔嚡，但只可以話過得去，因為硬硬地，同唔係好夠juicy。
秘製名古屋炸雞翼：$121/十二隻；日文＂鳥＂可解作＂雞＂，＂羽＂可解作＂翼＂，而鳥羽既主打菜當然係雞翼啦。我地叫左六隻辣，六隻唔辣黎試。我唔係好食得辣既人都覺得辣嗰隻唔夠辣，味道有少少似薯片咁。如果只係睇相會覺得雞翼好乾，似燒多過炸，不過食落就會明白到咁係因為Toba既雞翼少左層厚厚既粉或麵包糠，而且唔肥唔油膩。
田樂豆腐：$38；面頭既甜醬令我諗起臭豆腐。熱辣辣，好大件，重好多汁。軟軟既皮包住嫩滑既豆腐好辣口，味道一般啦。
串燒牛脷：$28/串，每串四件；夠厚得黎有口感，非常爽滑，加上灑係面既七味粉已經足以令牛脷串燒得到滿分。當晚encore菜式之一，必吃推介四。
串燒豬頸肉：$20/串，每串四件；好juicy，不過太瘦同埋厚得滯所以硬左少少。落鹽嗰位師傅都重手左dd。
串燒雞肉棒丸：$30；本來以為係普通雞肉碎整埋一串，點知係一款好有驚喜既串燒。配上甜甜既醬汁，外表雖然平凡，但咬落脆脆地，好似肉碎內有雞軟骨咁，坐上客更形容為此煮法為神來之筆，精彩！ 必吃推介五。
串燒雞肝，串燒雞腎：$18/串；有陣雪味之餘，又粉又乾，唔掂。向姐姐仔投訴完之後佢換左碟酥炸雞腎比我地，算佢啦。
天婦羅名古屋扁烏冬：$75；味道好好，不過唔係好夠湯。扁烏冬貌似河粉，口感好有＂al dente＂ feel，彈牙得黎煙煙靱靱。推介六。
名古屋特制燒鰻魚飯：$128；姐姐仔解釋有三種食法：淨食；加湯食；加湯加配菜全部一齊食。我地係食家黎架ma，所以逐一去試。淨食覺得唔係好夠味，鰻魚唔腥，個皮好脆。加左湯味到濃左，濕濕地好食好多（唔好誤會，未加湯前個飯並唔係好乾），落多少少湯就好似食泡飯咁。所有野lo埋一齊食就覺得有少少咸，所以個人認為最佳食法係淨加湯。
炒野菜：$48；菜雖爽口，但係太甜太多汁，唔係好啱我地口味。
朱古力甜品：送既；滑滑地，唔係好甜，細細碗唔怕溜，好的骰。
Post
