鳳城酒家 (Moved) New Location

由焚化爐兄的一個留言開始，十二小時之後，就演變成一個即興茶聚之局。今次的出席者有Ray、Olivian、雪怡、Florence、honey及伯母、Lulula、Lazyqueen、FoodKing、MM1970同我，十一個人一張大檯，很是熱鬧。談起鳳城這個品牌，少不免話題也會帶到「那間先、那間後，那間是真、那間是假」的問題。但在於筆者而言，最緊要好吃，店名背後的故事，當花絮來聽亦無不可，是不用太執著的。叫了幾個小菜，十幾個點心，擺滿了一檯，幾壯觀。點心有懷舊蛋撻、蒸粉果、高湯炸粉果、馬拉糕、牛拍葉、排骨、雞包仔、麻蓉包、燒賣、三款腸粉﹝蒸/煎/包炸春卷﹞、鯪魚球等十幾款點心，加埋幾個小菜如咕嚕肉、炸子雞、燒腩仔、海浙同一早訂定的焗西米布甸。點心方面，幾款懷舊的都交到功課。個人計仍然最喜歡高湯炸粉果，粉果皮炸得鬆脆，淋上上湯，好味道；蒸粉果也不錯，幾有特色；炸子雞皮脆肉嫩，咕嚕肉則以量取勝，比桃花園及港大校友會的遜色不少；焗西米布甸雖然叫了大的，但因要分九碗，所以一人只得大半碗。個人覺得份量恰可，但亦有食友覺得不太夠喉，味道方面還算不錯。埋單七十蚊，不知大家覺得價錢如何，我就覺得幾抵食。