紫荊閣海鮮酒家 (Closed)

又跟老友記們聚會。正苦惱要去食乜之際，老友食家又再成為本人之苦海明燈，老牧童搖指一點，一班人浩浩蕩蕩就入嚟一試懷舊菜...冬瓜盅料足之餘湯夠清，實在難得，誠為夏日消暑妙品...沙律龍鳳球以雞肝及蝦作料啄成球狀，再沾上芝蔴炸成。夠香口，可惜面頭沾上厚厚嘅沙律醬，鮮味全蓋，大大失色；八寶鴨肉算軟糯，餡料亦足，若果味可以調得濃D就更對味...花膠扒時蔬，菜炒得嗦嗦聲，花膠炆得夠淰，獻打得並不太杰，味道清新而不俗....全晚精華所在當然係等咗成二十分鐘嘅鴨腳包--- 以鵝腸包住切粒肥义、雞肝及鴨脚而成，再搽上义燒汁燒而食之。肥义嘅油潤；雞肝嘅粉滑；鴨腳嘅咬口，再加上個微甜嘅义燒汁，真有如天堂美食，吃得不知人間何世..吃得興起，再嚟個蝦炒蛋。蝦夠彈牙新鮮，蛋亦算係滑蛋。可惜味調得太鹹，埋唔到尾...但單係一味鴨腳包已令人歎為觀止...