好媽媽台灣館 (Closed)

四款食物中最好味係塔香鹽酥雞，夠香、夠味、夠脆，咬落仲有肉汁，冇炸到變雞肉乾，雞肉頗厚身，有咬口，送飯一流，九層塔要快手食，放耐咗會由脆變軟。第二樣食得高興嘅係台式炒米粉，堅用新竹米粉，有誠意，用料豐富有菜有肉，更有鑊氣，亦夠份量。但係呢，油就多咗啲，同埋汁多咗啲，唔同台北嘅咁乾身，整體感覺依然係良好。店方推介滷肉飯同蔭瓜鳳梨苦瓜雞湯，反而麻麻地。滷肉飯嘅肉同汁都量少，啲汁只係得面層咁多，去唔到飯碗中層位置，唔夠撈飯，但有一個欣賞位，就係用咗珍珠米，誠意x 2；雞湯唔苦唔甜，味道不明，而蜆只見殼不見肉。今回二比二平手，下次會試其他嘢。難得嚟到呢頭，出舖頭行遠少少過斜對面，就喺一級歷史建築雷生春，入面仲有涼茶飲，食咗炸物後怕熱氣嘅啱晒。