Niku Niku (Closed)

今晚約朋友黎大坑呢間高級日式燒肉店食晚餐。呢度門口好有型啊全黑。呢度師傅係日本人，賣既牛都係高級鹿兒島和牛，係可以生食架，所以今晚都係燒到三成熟就已經食得。<和風生牛肉片>（$150）呢個份量都幾大，每塊都幾厚，有半厘米厚。調味係酸酸地再加上蔥頭，好惹味，加上有啲筋，所以都好有咬口，口感就幾似鯛魚。<和牛燒肉盛合>（$540）呢個盛合有三款牛，每款兩片，岩曬兩個人分享。分別有牛柳中部、西冷、牛小排。牛柳口感軟，脂肪就無咁高。西冷脂肪含量高啲所以感覺牛味更出。牛小排就達至入口即溶境界，超正！<蔬菜拼盤>（$60）呢個幾抵食，有多款蔬菜，食極都有。呢度好在有經驗老道既侍應幫手燒，令每款厚度不一既蔬菜都燒到啱啱好。<日本赤雞腿肉>（$110）有四件，雞腿肉夠曬嫩滑。要燒得好真係好考功夫架，因為雞肉唔係好似牛咁平一塊。<白飯>（$30/個）係日本珍珠米，好正好有米香，份量都幾大碗架。呢度價格唔平，但勝在食物高質，服務亦好有日本既水準。