黃枝記 (Closed)

來自澳門嘅「黃枝記」，係澳門一家老字號嘅粥麵店，主打古法製作嘅手工竹昇麵。美味嘅貼士來自於師傅坐喺粗竹竿上，反覆打壓兩個鐘，再加入全蛋，所以打出嚟嘅麵糰充滿韌性。今日同媽咪食晏，佢提議嚟呢度食，話啲麵好好味㗎喎，雖然我唔鍾意食麵，不過試吓囉，邊個話嚟呢度一定要食麵㗎呢？麵醬豬軟骨撈麵（＄38）媽咪揀咗佢最鍾意嘅撈麵，一絲絲幼麵入口蛋香四溢，麵打得夠爽所以食起嚟夠爽脆，有少少al dente感覺，口感非常好，而且冇鹼水味道，唔鍾意食麵嘅我都好鍾意食呢個麵；碗上嘅豬軟骨份量可接受，軟骨上黐住頗多豬肉，幸好煮得幾入味及軟腍，一咬就骨肉分離，將麵醬撈落麵一齊食非常惹味，食飽都唔會覺得好膩，果然係招牌菜！黯然叉燒飯（＄45）貴價嘅黯然叉燒飯就冇錢食喇，呢個平平哋我就試吓啦！用一隻公雞碗載住4片叉燒及一隻煎蛋，豉油另上；叉燒唔係想像中嗰款紅色叉燒，而係喺叉燒表面加上砂糖後再火炙，顏色比較深，每塊叉燒邊都有火炙過嘅痕跡，食落有輕微嘅火炙味道，肥瘦適中而且有豬肉味道，其實似豬頸肉多過叉燒，亦都幾軟腍；煎蛋冇流心嘅效果，否則撈埋一齊食真係會好好多；豉油偏甜但冇乜鹹味，否則就會蓋過叉燒嘅火炙味道喇銅鑼灣以