麻辣風雲 (Renamed) View

天氣開始熱啦，想食一啲辣野出返身汗，係旺角搵黎搵去，都唔知食乜好。行到去瓊華中心，見到有間餐廳叫麻辣風雲，啱晒心水，隻腳即刻走左去搭𨋢啦。上到去發現裝修古色古香幾有味道咁，環境舒服既因為坐既位置好闊落。一黎就比隔離枱既一盤盆栽吸引住，原來嗰棵係荔枝，呀~唔係，係荔枝形狀嘅蝦球，底盤仲係咁噴煙，超型呀。今次叫左荔枝蝦球，酸菜魚，紅糖糍粑仲有炸饅頭。荔枝蝦球擺盤好靚，而且食落好彈牙點下個醬汁甜甜酸酸，一流。講到擺盤靚，仲有炸饅頭，個隻小船又係可以打下卡。最好味既係酸菜魚，酸同辣度可以根據自己喜好選擇。我哋揀咗中麻中酸少辣個味道勁啱我心水，份量再多都食得晒，魚肉又滑又嫩又無骨。我哋仲叫左一杯果茶同洛神花茶，我一大杯果茶夠晒兩三個人飲，而且果味好香甜，而洛神花茶生津解渴，用個酒埕黎上枱好有感覺呀。最後食埋紅糖糍粑，香甜軟糯結束完美的一餐。