海潮食堂

Open Now

Now Closed

今日約緊朋友去APM睇戲，有D時間當然要搵好野食。朋友話附近有一間人氣食堂，雖然門面並不起眼，但裏頭嘅食物配撘新穎，一試難忘咁話。講到咁，好難唔試架喎，即刻跟朋友入去試試佢。一入到去，比金毛老闆嚇一嚇，不過佢笑容滿面，細心有禮嘅招呼，立即比佢溶化左。我同朋友分別點左兩個招牌菜，牛腩蝦條煎米粉同葱花蛋治烘底。首先牛腩蝦條煎米粉，個蛋煎米粉賣相幾特別，有D似兩面黃，十分香脆。牛腩蘿蔔用一個不鏽鋼碟另上，炆得好稔好入味，加上蒜泥辣椒粒，非常惹味。雖然煎米粉無乜味，加上牛腩辣汁一齊食，就配合得天衣無縫。不過份量有D大，細食嘅未必食得晒。至於葱花蛋治，一件蛋治入面有兩層，一層係夾牛油，另一層係夾葱花蛋，牛油味唔會污染葱花香，咁嘅做法好考功夫，亦顯得出老闆嘅細心。由食物睇得出，老闆好用心經營呢間小店，同顧客打成一片，經過嘅朋友不仿一試。