山東餃子館 (Closed)

呢日同事懶唔想出街，所以lunch要我買埋外賣返嚟餵食😒。由於外賣自取app有優惠，所以喺app到落單再去拎。餐廳位置喺元州街，隔離幾間舖都唔係食肆，所以唔多起眼。一去到外賣就已經ready，但個收銀阿叔禮貌唔多好。麻醬雞絲粉皮($34)，涼拌小吃嚟講份量算非常多！🐔雞絲多到一個點，非常慷慨，真係每一啖都食到。麻醬亦都唔算膩，唔係太杰嗰種，撈埋涼皮食好正。啲粉皮好得意，一捲捲的，唔係平日河粉狀咁攤平。西洋菜鮮肉水餃($36)，食餃子有得揀，我一定揀西洋菜💚。如果要淨餃子，就有10隻，餃子麵，就有5隻；叫煎餃就加多$3。我哋要咗淨餃子10隻🥟(無湯的)，本身驚放耐咗啲皮會痴埋一齊，好彩無。餃子皮滑、厚度適中，無爆餡，西洋菜味濃郁，點埋醋食，真係唔錯👍。總括嚟講，因為食過今次外賣，我認為係可以嚟堂食下，雖然環境望落一般，但都正常，好似唔係太差。今次食呢兩樣食物都好食，特別係麻醬雞絲粉皮，真心推介，如果喺夏天食，更加不得了😋！餃子館定價非常相宜，平均都係$3x，絕對係抵食之選。