川府宴 (Closed)

近排想食川菜，友人帶路去銅鑼灣試下樓上餐廳。第一次試冰菜沙律，冰菜夠曬凍，入口好冰涼爽脆啱曬夏天食。叫得沙律當然要淋下芝麻醬，酸酸地夠開胃嘛。燈影鴨真係薄到透曬光，風乾到半脆半韌，上面淋咗類似水煮魚嘅辣汁，食落味道無咁寡。底下有啲炸芋頭絲墊底，幾脆口但無乜味。手撕雞好大碟，但雞肉比較少，有大量萵筍絲同炸芋頭絲墊底。雞肉有啲嚡，麻辣味幾勁愈食愈辣。友人點咗魚春卜唇煲，湯底類似水煮魚嘅麻辣湯。本人唔太鍾意食內臟，好在入面仲有萵筍片同闊薯粉，雖然唔多但都好過無。最後都試咗少少魚春，個人覺得有啲腥，友人就很喜歡。除咗沙律外碟碟味道都夠麻夠辣，食到最尾食咩一樣味，陣味好勁～😊