嚐館 (Closed)

呢日放工喺黃大仙走，時間已經唔早😖，所以求其買啲嘢食返屋企。唔想幫襯連鎖店，見有間叫「Cityfresh Bistro」嘅餐廳門口貼咗好多餐牌出嚟，款式好似幾多，就試吓。外賣自取有9折優惠🥡，等候時間正常。食物選擇包羅萬有，包括有中式小菜、馬來西亞喇沙、西餐意粉牛扒同韓式飯等等。烤肥牛肉辣泡菜煎蛋飯($78)，🇰🇷泡菜飯紅卜卜，睇色水就知道夠哂味，無錯，佢嘅辣度同酸度都好顯著，泡菜爽口，肥牛份量亦好慨慷👍，上面仲有隻煎蛋添。泡菜飯份量比起白飯多起碼1.5倍，男仔都未必食得晒，但飯質略嫌比較笠身🍚。霸王雞($68/例牌)，小菜份量唔少，🐔雞件大部份均連骨，但幾入味，所以都OK。底部仲墊咗西蘭花同椰菜花，配飯一流。蜜椒薯仔牛柳粒($68)，牛粒同薯粒同樣唔錯，🥩牛粒有咬口，🥔薯仔軟稔，另外仲有三色椒。整體調味得宜，唔會甜得過份。飲品方面☕️，熱奶茶味道幾濃又幾滑。總括嚟講，呢間黃大仙街坊店提供環球菜式，總有一款啱你🌍。題外話，我亦留意到餐廳門口有好多麵包同糕點賣，唔知係咪自家烘焙呢。