Video
Read full review
2004-07-03
73 views
等左一年，又到食黃油蟹的時候。食友一年只聚六次，自從上次食完蛇後就到現在的黃油蟹宴今個星期又再會。原本七個人，其中一位食友仲帶來了鬼佬男朋友，八個人就成了一圍。幾日前來探路時，見利苑呢期做緊套餐，聲稱688蚊包八兩一隻，仲有幾款唔差的小菜，好似有翅又有雞咁。但一年一次，主角當然是隻黃油蟹，其他小菜盡是次要。所以一致通過叫一隻九兩至十兩的大蟹，另散叫小菜好過。事先已關照部長留蟹，亦要於當日預早處理，所以食呢味野不同大閘蟹，最好就事先訂定。某奄尖食友特別麻煩，自備香醋一支，試過係比酒樓的香少少，亦無咁酸，佢話要七十幾一支，咁有便宜大家當然卻之不恭啦！鬼佬亦唔係無貢獻，佢都帶來智利紅酒一支，有人話係好野，飲落麻麻地，唔係好對口味，不過唔使錢，當然亦多謝夾盛惠啦！除了清蒸，呢度還有什麼神草什麼蒸的，一年吃第一次當然是原味的清蒸，創新的整法還留待第三或第四次吧！八隻蟹齊齊上檯，件頭比想像中小，但拿上手卻十分墜手，一號稱人肉電子磅的食友話夠九兩有突；熱度夠，係食黃油蟹的基本條件；開蟹蓋，見黃油充斥成個蟹身，夠足油；黃油呈淡黃色，有光澤，看樣子是靚貨；用匙羹吃一口，確實係甘香可口，好有水準；口感似糖
食友一年只聚六次，自從上次食完蛇後就到現在的黃油蟹宴今個星期又再會。原本七個人，其中一位食友仲帶來了鬼佬男朋友，八個人就成了一圍。幾日前來探路時，見利苑呢期做緊套餐，聲稱688蚊包八兩一隻，仲有幾款唔差的小菜，好似有翅又有雞咁。但一年一次，主角當然是隻黃油蟹，其他小菜盡是次要。所以一致通過叫一隻九兩至十兩的大蟹，另散叫小菜好過。事先已關照部長留蟹，亦要於當日預早處理，所以食呢味野不同大閘蟹，最好就事先訂定。
某奄尖食友特別麻煩，自備香醋一支，試過係比酒樓的香少少，亦無咁酸，佢話要七十幾一支，咁有便宜大家當然卻之不恭啦！鬼佬亦唔係無貢獻，佢都帶來智利紅酒一支，有人話係好野，飲落麻麻地，唔係好對口味，不過唔使錢，當然亦多謝夾盛惠啦！除了清蒸，呢度還有什麼神草什麼蒸的，一年吃第一次當然是原味的清蒸，創新的整法還留待第三或第四次吧！
八隻蟹齊齊上檯，件頭比想像中小，但拿上手卻十分墜手，一號稱人肉電子磅的食友話夠九兩有突；熱度夠，係食黃油蟹的基本條件；開蟹蓋，見黃油充斥成個蟹身，夠足油；
黃油呈淡黃色，有光澤，看樣子是靚貨；用匙羹吃一口，確實係甘香可口，好有水準；口感似糖心蛋黃亦起沙，廚房的火候剛好；之後再加香醋吃多幾口，仍軟滑又香口，好掂；有食友在討論究竟這是那裡來的黃油？其實邊理得咁多，好吃的黃油就是了；拆了蟹腳一看，黃油並不十分「頂到篤」，可能在事前雪蟹的工作還未十足，不過蟹腳的肉都混有絲絲黃色，算唔錯；黃油蟹不同肉蟹，肉質雖同樣鮮甜但較腍；總結來說，這個黃油的味道，無論毚本身及烹調方面，俱有水準，雖然係貴一點，也是值得的。鬼佬食到一口一手都係，但好食又令佢顧不得儀態，幾得意。
要對付隻蟹，一路食一路傾都已經半個鐘有多。食左黃油，什麼小菜都只是配角，只是叫了幾個清淡的；叫了一碟叉燒腩仔雙拼，給鬼佬有個後備，結果發現是過慮了，佢食蟹不知食得幾開心；不過這裡的叉燒是幾有水準的，多廋少肥，唔韌，亦甚為爽脆；腩仔是三層肉沒有骨的，可能又是海都錦叔所創，不知幾時興起吃這些了方腩肉，我還是喜歡原隻斬連骨的；
另外一客冷盤是海蜇拼鴨舌，釀豆腐，雪裡紅浸勝瓜同一個如意吉祥﹝清炒五秀﹞加埋一隻脆皮雞，食到捧住個肚，滿足矣。
甜品除上次吃過的楊枝金露外，今次還叫了龜岭膏、榴槤班戟同杏仁露，這裡的龜岭膏亦不弱，好奇怪有水準的食肆如鏞記都有呢一味作甜品，是其他新派食肆所沒有的。
埋單俾埋貼士三千七，開瓶費免收，圍起每人四百六十幾。隻蟹食得大隻，仲平過食套餐，除非大家對套餐內的小炒好有興趣，如不是建議還是散叫較上算。
飲飽食醉之際，有食友已經即場約定再吃「崩牙成」，看來又要再聚了。
Post