牛摩+ (新都城中心二期) (Closed)

市面上日式打邊爐好多，但係要搵一間係黃店嘅其實都唔容易，最近發現呢間嘅老闆喺同牛涮鍋嘅老闆唔同，又係黃店，所以嚟試下。同其他日式邊爐一樣，佢係任食放題， 有唔同級數嘅牛肉套餐，價錢唔同，我哋今次揀嘅係牛小排，$269 再加一。牛肉嘅質素其實屬於唔錯嘅，雖然去嚟到第4盤比咗碟明顯好肥既，侍應就解釋話因為嗰嚿肉咁啱可能砌到啲頭頭尾尾。我哋一晚叫咗大概六碟肉左右，都係得一碟有咁嘅狀況。至於另外雞肉豬肉嗰啲就不過不失。 另外佢都係可以自己斟汽水，佢仲有兩個沙冰，咖啡奶茶嗰啲都有。至於菜/菇/丸etc都係自己夾, 但個啲嘅選擇其實就好少，特別係啲丸好少，冇蟹柳冇芋絲個d，但有響鈴。 佢仲有壽司同埋沙律係自助攞嘅。最後係甜品，佢有個凍櫃嘅入面有啲迷你嘅泡芙﹑芝士餅﹑奶凍同水晶餅，坦白講就真係麻麻地嘅。 另外就係有雪糕，都真係屬於唔好食嘅，但係佢嘅toppings有六款，都算唔少嘅。整體嚟講，佢主要問題係食物款式唔夠多甜品唔好食，但overall係合格既。