TAP - The Ale Project

Open Now

Now Closed

身處旺角想飲手工啤酒第一時間一定諗起黑布街，印像中全盛時期呢度有唔止一間嘅手工啤酒餐廳，咁耐無嚟，今晚就過嚟爽皮一下。Iron godess tea，鐵觀音威士忌，呢隻鐵觀音威士忌由少爺出品，純香港製造，入口帶有威士忌嘅清香，後續有鐵觀音嘅餘韻，風味獨特。麻辣喵薯仔沙律，經典嘅薯仔沙律上面竟然有麻辣粒粒同埋四川臘腸，極富 fushion 嘅意味，臘腸嘅四川式風味送酒一流，新薯口感紮實，配合埋辣椒蛋黃醬，非常美妙。炸茜漢堡，愛茜嘅伴侶見到漢堡上面海量嘅芫茜即刻心心眼，佢唔單止係量多咁簡單，而且仲係炸過嘅添，漢堡肉選用咗本地屠宰嘅免治牛肉，食落非常 juicy，蒜蓉沙茶蛋黃醬混和豐富嘅牛味，無敵。黑布茄牛意，喺網上見到其他食友嘅相片已經令我躍躍欲試，牛肉呈肉粒而非一般肉醬狀，口感更加扎實，鯷魚嘅鹹鮮同埋黑蒜獨有嘅香氣令到整個食感更富層次，我選呢個為年度好意。