熾工房 (Closed)

公司附近食飯食到悶，同事介紹呢間炸雞雖然係小店但係有良心又好食，仲要價錢唔貴，所以襯今日有個long lunch time一於行遠兩條街都要試一試舖頭唔算好大不過空間感十足，原來餐廳係由長洲開始，長洲可以嚟到西營盤開分店，果然犀利，叫完餐之後等咗10 分鐘左右先有得食，原來係即叫即整，想食好嘢就要有耐性等吓。叫咗一份炸雞配薯條，我見到有黑松露醬，所以貪心啲加咗少少錢要黑松露醬，因為早幾日喺大型R字西餐廳食黑松露薯條一份薯條都要幾十蚊，呢度成個套餐都係幾十蚊，加個黑松露醬都係加$12 ，所以薯條控的我點都要試。炸雞一上枱已經聞到好香，最緊要係新鮮整起，連薯條都係新鮮炸起脆卜卜，粗薯條再點唔同嘅醬汁，味道即刻升級，黑松露醬好香好creamy ，但估唔到原來蜜糖芥茉醬仲好味，酸酸甜甜有芥末味但係唔會好辣，兩個醬都非常好食，超正啊！焗雞有兩舊，無炸雞咁熱氣，味道濃郁，雞皮夠香脆，最緊要係雞肉好嫩滑，每食一口都有豐富嘅肉汁，真係超級好味，同麥記同肯記的炸雞真係冇得比，性價比高，同事果然冇介紹錯，下次要再試其他野。