Outback Steakhouse (德福廣場2期) (Closed)

心掛掛黑糖麵包，就黎呢間新店食，地方好大，裝修得好靚，而再入啲嘅位置整到火車入面咁，幾特別，座位闊落坐得舒服。落單上菜都好快手，侍應會自動自覺斟水收碟，服務好。今次三人叫兩樣菜已經好飽，分量多又大，平均每人$150。黑糖包 Free食咁多次都仲係覺得咁好食，包微甜外微硬內夠鬆軟，加上牛油咸咸地咁，更香更好味。烤肋骨雞搥芝士薯條拼盤 $168肋骨同雞搥各有6舊，薯條分量都算多，好抵食。肋骨個醬味道好濃，酸酸甜甜，酸味較出。雞搥，炸到脆卜卜，咸味重左啲啲。薯條，夠實在，外脆水內軟，芝士再多啲咁就Perfect。美式慢燒安格斯肉眼牛扒(8OZ) $228好香口，牛香味愈咬愈出，呢個熟度岩岩好。而配菜揀左薯條同焗甜薯，薯條同頭先一樣好食，而焗薯真係必食，黎到熱辣辣，睇住個Cream溶化，口水都流，個甜薯真係好夠甜，唔係假甜味，配埋Cream變到好滑口好creamy好好味。