摩登士丹里 (Closed)

摩登士登里喺屯門龍門居有店，最近有朋友告知元朗亦有分店，有部分餐點同龍門居店一樣，好似之前試過嘅芋圓甜品。新開業關係，加上晚上到訪，客人唔多。外帶形式，仲有啲飲品系列，主打懷舊經典港式飲料，分奶茶、鴛鴦、紅茶/綠茶、梳打、原茶，跟隨熱潮，亦有手炒黑糖系列。黑糖系列分珍珠冰、仙草冰，設有少甜，不設走冰，分中、大杯裝。黑糖珍珠冰 $25/M雖然名叫珍珠冰，實質亦係黑糖珍珠奶，見店員先將黑糖掃於杯邊，盡量做番清晰紋路，賣相合格。珍珠約1/3杯，份量不少，拎上手微溫，搞勻前直接飲到底會有好濃郁蔗糖味，唔係我喜歡嘅類型，搞勻後甜味消失得無影無蹤。珍珠本身唔入味，口感偏腍身軟糯。味道唔係太自然，有少少似荳奶，整體一般。