Black As Chocolate (Closed)

久聞台灣過江龍Black as Chocolate大名，據聞同新加坡Awfully Chocolate類似都係主打朱古力蛋糕。是夜喺九龍城食飯終於可以順便買個朱古力蛋糕試吓。除咗原本六吋蛋糕外，最近新增迷你版兩吋蛋糕。迷你版蛋糕好精緻，的的骰骰一人一個剛剛好。兩吋蛋糕大約五十蚊一個，價錢絕對唔平，仲要冇堂食，只可外買攞走。不過既然都想食好耐，豪就豪一次咁多啦！兩吋蛋糕只有黑嘉侖草莓同榛果味，結果每樣買一個。榛果味上面灑上薄脆，切開蛋糕一層朱古力蛋糕一層朱古力醬相間，海綿蛋糕輕軟有彈性朱古力味香濃少甜，再加上朱古力醬每一啖入口都多重享受，難抵黑魔魅力。黑嘉侖草莓味就喺原本朱古力味外添加咗槳果清新口味。有機會都想試吓其他味道如香蕉朱古力同原味朱古力。