魚屋

Open Now

Now Closed

原本諗住去荃灣廣場間一田嘅天仁茗茶買杯野飲，再去眾安街覓食。點知無啦啦癮起想食日本野，咁就比天仁茗茶旁邊間魚屋吸引咗。😯鹽燒鯖魚定食（$58）- 燒魚、檸檬、少少類似泡菜嘅配菜，同埋一碗面頭灑咗啲黑芝麻嘅白飯。味道就普普通通，無咩鹽燒味，亦都唔係燒到表皮香脆。加上魚都唔算太大舊，唔夠送飯，搞到食到最後變咗齋食白飯。😥麵豉湯- 跟餐送嘅麵豉湯都幾大碗，湯料十足，有大大舊三文魚肉。不過失望嘅係有陣腥味，同埋有唔少魚骨，同行友人都比魚骨吉親😥，所以大家都係小心為妙😅。三文魚海膽丼 （$108）- 三文魚生五片，海膽份量都佔成四分一個碗。海膽唔腥，十分creamy，更加唔會溶到一pat pat，十分鮮甜。三文魚生都不過不失。成個丼以咁嘅價錢黎講，份量都算抵！👍🏻整體黎講魚生丼比起燒魚定食更為優勝，只係美中不足嘅係個麵豉湯同埋個環境。因為當你食緊野嘅時候，都不斷Feel 到背後有人等位，望實你嘅壓力，其實都真係唔係咁自在😅。