紅磡冰室 (Closed)

因為貪方便先會到呢間茶餐廳買三個外賣飯盒，點知一試便出事。我地叫咗三個外賣飯盒: 蕃茄牛肉飯、涼瓜鮮尤飯同粟米雞絲飯，共127蚊。呢個價錢一啲都唔平，仲無熱飲送，不過呢間嘢有少少名氣，算~俾完錢，本來唔想入餐廳等霸住啲地方，點知有個所謂經理叫我地入去等，本來以為佢好心，後來發現成間餐廳啲冷氣口都滴水，佢即時話，你地企喺門口，個自動門成日開，咪會滴水囉！之後等咗15分鐘，一個飯盒都未出，覺得唔係好對路，就同收銀阿姐講，佢叫我地再等。25分鐘後，我地再同其他侍應講，佢地搵咗嗰個經理追單，個經理好負氣話整緊，我地話如果係漏單，我地唔等啦，不如退錢。佢再入廚房，話有兩個整好，叫我地再等。如是者我地等咗35分先買到3盒碟頭飯，個經理仲好委屈同哭喪咁嘅面口對住我地，好似我地唔啱咁，明明係漏單，又唔認。返到屋企，打開飯盒仲嬲。味道已經一般，仲要個粟米雞絲飯啲雞絲唔熟，係生嘅！生雞肉有菌，會食死人！未試過茶餐廳咁差質素！