波記(大排檔) (Closed)

夏日炎炎，著住裇衫帶住呔，坐喺室外烈火熊熊的煮食爐隔離食野，真係需要很大的勇氣。...又或者只係因為太過為食的關係。點都好，是日冒住臭汗淋漓的危險到了木人巷，因為睇到豬扒好似幾好食﹗本想要一個椒鹽豬扒飯，但見到師傅攞住個大鍋係咁拋，沒有唔試炒粉麵的理由？最後要左一個乾炒豬扒米。食魚蛋粉時小弟會揀河粉唔要米粉，但到了炒粉時會掉番轉。可能係因為米粉幼啲，較容易沾上醬汁，而且口感較爽口，用來炒較出色。隔離枱有個男人叫左一個炒飯，兩三分鐘就有得食，佢都不禁講左句「嘩，咁快嘅？」阿姐就即刻話「咁都叫快？算慢喇﹗」我的炒米都係等左兩三分鐘有得食，此時先發覺身上冇現金，廢事畀人鬧唯有就去攞錢。出奇地，伙計冇講啲咩，仲叫我慢慢唻...雖然佢地粗聲粗氣的，但只係想做多啲生意，唔代表態度差的。攞完錢即刻就返唻食。豬扒有少少乾，但幾入味的，比一般的好。米粉顏色均勻，炒得非常有鍋氣夠乾身，味道剛剛好又唔會太油膩。加上洋蔥、蔥同芽菜，好快就食完大大碟的米粉，好飽。食的時候好彩有個大風扇吹住，如果唔係好食都假，已一早熱死了。廿幾蚊有如此大碟又好炒功的米粉，很抵食呢。不過下次一係外賣，一係冬天先唻會更好﹗