ASAP As Simple As Possible

Open Now

Now Closed

今晚1行5人又去ASAP 食晚餐，6點半左右到，大約有5成客。叫左燒豬手鍋跟飯，牛肋骨鍋跟意粉，燒豬仔骨跟薯條，吉列黑豚蓋飯及炭燒雞脾扒意粉。今次要左柚子醋田園沙律，好清新及份量不少，柚子醋提升左個沙律令到胃囗大開。家人叫番茄湯，好濃烈好足料，好似飲緊番茄蓉咁。燒豬手鍋配咖喱汁，隻豬手肉不多，骨頭好大舊，肉質有點乾皮也不脆，好一般。牛肋骨鍋配燒汁，份量不少，炆到好淋，帶點脂肪，入口即溶，好味。以上2個鍋底有大量什菜，可以平衡一下，幾好。燒豬仔骨，肉汁豐富又嫩囗，一咬即開，跟半個燒番茄另配薯條食，食過兩次，水準高，好好味。吉烈黑豚蓋飯配咖喱汁，吉烈黑豚外脆內軟，一點也不老，仍然保留到肉汁，吾錯。炭燒雞脾扒意粉配磨菇汁，雞扒皮好脆肉好滑，意粉剛剛好又彈牙，好出色。甜品叫左西多士加𦍑味雪糕，西多系煎嘅，所以冇咁油膩，亦都好鬆軟，點一些焦糖漿，好快就食完一份，美中不足系份量太少。餐飮叫左凍檸茶，好大杯但茶底有點澀，家人杯熱咖啡就好香。