大勝丼 (Closed)

經openrice訂左星期六的中午12點，準時去到大勝丼門口，餐廳內外仍然烏燈黑火，又焗又熱，廚房仲忙緊準備食材，好似未開始營業咁，我哋唯有開手機照明，過左幾分鐘，刺身師傅終於發現我哋啦，話侍應未返，叫我哋是但搵個位坐。本來點左帆立貝海膽丼同燒肉元氣爆丼，過左一陣隱約聽到...刺身師傅：海膽未送黎喎。侍應反問：琴晚唔係仲有兩板咩？刺身師傅：最後兩份琴晚賣左啦... 北海道海膽就仲剩兩板。點解餐廳唔好好點算食材數量，及時補貨，或者明知送貨時間唔穩定，預留最低存貨量呢😓，老公係為左食海膽而黎，唯有轉食北海道魚生爆丼，但海膽比例就少好多😭。北海道魚生爆丼，可以試晒多款魚生，尤其是海膽、甘蝦、三文魚腩、魚子都好新鮮👍🏻，但帆立貝味道怪怪地，吞拿魚好多筋👎🏻。燒肉元氣爆丼，果然冇令人失望，牛肉同飯的比例大約係2:1，肉塔成坐山咁高，飯索晒牛肉汁同燒汁，好好味👍🏻😋，飯的份量比魚生飯少，所以添左碗飯。可能廚房未準備好，食到一半，味噌湯先黎，有肉碎、洋蔥，但味道偏淡，而甜品就係提子味䈮蒻，一般嘢所以冇影低。