快靚正燒味粉麵茶餐廳 (Closed)

好久已經沒有回家食飯，今晚約齊兄弟姊妹回家食飯，當然要斬料加料先夠warm，今日就落平時行深水埗食開的老字號燒味粉麵茶餐廳，鐘意佢地D燒味全部自家出品，食落零捨不同。老闆特別好傾又好客，我才知道已經14年老字號，更在元朗自設廠房，所以先控制到每天的出品日日新鮮，而且不會放隔夜，讓人食得安心又放心，今日等我斬多D料比屋企食先。《燒肉 $90/斤》燒肉個皮好酥脆，不是硬繃繃的，肉質肥瘦相間好平均，食落好嫩滑，味道不會過咸亦不油膩，不用點任何醬料，本身的味道已經好正。《燒鵝 $190/半隻》現場睇住師傅斬，肉汁好豐盛，外皮油潤，還傳來陣陣鵝香，睇到聞到真令人垂涎欲滴，真想馬上整碗燒鵝瀨醫醫肚先。回到家第一時間已經偷食，還是暖暖的，皮香肉嫩夠汁潤，本人覺得跟本不用到某知名燒鵝店食，性價比一流。《叉燒 $90/斤》叉燒亦不錯，半肥瘦，蜜汁香甜，肉質細嫩，送飯一流。《乳鴿 $50/隻》乳鴿入味，冷了也不會乾硬，依然保持到水準，肉質同樣夠嫩，食到大家食指大動。其實餐廳除了燒味外，還有早餐、快餐、飯餐、車仔面餐等等，有很多選擇，所以我每次去深水埗都定必光顧。