Video
Read full review
2014-12-29
312 views
小弟後生個年代，好流行有種猜枚叫「十五二十」，依家應該無乜人會玩，後生一輩應該都唔知喺乜，其實好佩服諗猜枚玩法啲人，好多都唔使咩道具就玩到，好似「黑芝麻、白芝麻」咁。過往，小弟都有幸出席過「開飯喇」嘅開年飯聚，通常都會晌農曆年過後設宴款待一眾殿堂 / 資深會員，但今年就搞得好似猜枚咁即興，年尾突然收到邀請，距聚會日都唔夠兩個禮拜 。原來，喺因為想就番「開飯喇」嘅「15」週年生日日子 ，選址喺由瑞士鐘錶品牌Franck Muller開設之新派中菜館「Eighteen Sharp」。不經不覺，原來自已加入咗「開飯喇」超過7個年頭，查實「殿堂」、「食家」都喺一啲虛銜，懂食嘅大有人在，比起「識食」，我更鍾意人話我「惜食」或「適食」多啲 。一路以嚟寫食文都喜歡口語化，除撐吓廣東話之外，覺得親切啲，好似跟朋友分享美食，此外，食文用字盡可能都唔會又中又西，用得到中文就用中文形容，不過，有啲廣東音字還望大家指正指正 ！餐廳面積不算大，但裝潢富麗堂皇，瑰麗有格調，金黑對襯，金光閃閃，多盞大型水晶吊燈，一櫃名酒，一室高級西餐廳格局，之不過喺中菜飯局。除裝修靚，以頂級食材入饌，揉合中西元素，不拘一格
不經不覺，原來自已加入咗「開飯喇」超過7個年頭，查實「殿堂」、「食家」都喺一啲虛銜，懂食嘅大有人在，比起「識食」，我更鍾意人話我「惜食」或「適食」多啲 。一路以嚟寫食文都喜歡口語化，除撐吓廣東話之外，覺得親切啲，好似跟朋友分享美食，此外，食文用字盡可能都唔會又中又西，用得到中文就用中文形容，不過，有啲廣東音字還望大家指正指正 ！
餐廳面積不算大，但裝潢富麗堂皇，瑰麗有格調，金黑對襯，金光閃閃，多盞大型水晶吊燈，一櫃名酒，一室高級西餐廳格局，之不過喺中菜飯局。除裝修靚，以頂級食材入饌，揉合中西元素，不拘一格，菜式創意與手工兼備，亦喺其另一賣點。
雖然喺一餐中菜，但卻用刀叉為多。餐單一早印備好放在碟面，一共8道菜：1道五前菜拼盤、5道主菜、1客烏冬及1客甜品，單從菜名，大概了解到用料之精，大廚嘅心思。
五前菜 打頭陣喺以5款前菜作為一道小拼盤，分別有荔枝荷蘭串茄、乳香白肉卷、黑松露松茸松葉蟹腳、沙律菜燒汁牛肉卷、桂花腰果，每一款都做得精緻的骰，聽完個做汰講解，盡見心機處處。
荔枝荷蘭串茄 - 串茄去皮，以荔枝磨蓉再浸三日，入口荔枝味濃香清爽，甚有份子料理嘅感覺；
乳香白肉卷 - 將豬肉切成薄片，捲住蘿蔔，香煎上碟，惹味而有啲脆口，有少少意外驚喜；
黑松露松茸松葉蟹腳 - 蟹腳有少少偏鹹，卻好香黑松露味，面上有點松茸菇，爽爽脆脆；
沙律菜燒汁牛肉卷 - 金菇肥牛卷嘅清新版，整體較平實，無驚喜，反而底下嘅蜜餞菠蘿片好味；
桂花腰果 - 以桂花蜜沾滿腰果再焗，既清甜，又香脆。
五前菜：荔枝荷蘭串茄、乳香白肉卷、黑松露松茸松葉蟹腳、沙律菜燒汁牛肉卷、桂花腰果。
53 views
0 likes
0 comments
極為幽雅嘅菜名，亦喺一道手功嘅菜式，釀雞翼算唔上好特別，但去骨去肉就好講功夫。雞翼炸得金黃飽滿，一咬甘香脆口，絕不油膩，而雞翼之內，釀滿燕窩，真喺塞到爆咁滯，夠晒貴氣，不過，個人而言，口感上欠少少肉感 。至於伴碟嘅沙律菜及魷魚紫菜，既可清清味蕾，又能減減「熱氣」感，此外，酸酸辣辣，其食味又不俗。
黃金鳳翅藏玉液
31 views
0 likes
0 comments
法芥籽檸蜜焗海蝦 第三道為海鮮菜式，賣相清新簡單，但質高味優。大海蝦肉厚鮮爽，雖據介紹喺以法式芥末籽、山葵、清酒、蜜糖……等調汁醃焗，但味道頗有泰式風味 。而側旁嘅炸紫蕃薯絲，幼細香脆，又好有蕃薯味。
法芥籽檸蜜焗海蝦
18 views
0 likes
0 comments
一向都鍾意飲燉湯，滋潤保暖嘛，一道「黑蒜花膠燉雪雁」，以黑蒜、花膠、蜜冬、雪雁……燉足5個鐘，雖然色澤深沉，卻喺濃香不俗，清潤保健。當大家睇到食材之一「雪雁」，都議論紛紛喺乜，食友上網一查，維基百科嘅描述喺鴨科雁屬嘅鳥類，相信講完都唔知喺乜，我估大概類似喺鵪鶉、鷓鴣之類嘅細雀吧 ！
黑蒜花膠燉雪雁
23 views
0 likes
0 comments
依道菜明顯比較西式，但何謂「BB骨」未有解釋，因為睇落跟一般見到嘅豬肋骨大細都喺差不多。豬肋骨先以香草醃足一日，再焗，入口肉質頗鬆化，香草味突出；而伴碟嘅紅桑莓配菠蘿蓉蓮藕片，新鮮感十足，味道清怡，啱啱好中和濃味嘅豬肋骨 。
香草焗BB骨
17 views
0 likes
0 comments
香草焗BB骨
24 views
0 likes
0 comments
調味較少，以品嚐食材原味為主，油泡螺片口感煙韌富嚼勁，螺肉鮮味，不過，嫌唔夠熱辣，送到上枱只喺微暖；至於萵筍絲則絲絲爽脆，清甜爽口。
油泡螺片萵筍絲
24 views
0 likes
0 comments
澳洲和牛番茄濃湯烏冬 以日本稻庭烏冬製造，烏冬非常滑溜，湯底以鮮雞湯為主，唔似豬骨湯咁重味，但濃香鮮甜 ；兩片薄切澳洲和牛肉，脂香軟腍，的確用料上乘 。
澳洲和牛番茄濃湯烏冬
22 views
0 likes
0 comments
養生茶白玉丸子 晚宴尾聲，都喺時候上甜品，養生茶喺加咗杞子、大粒紅棗、玫瑰乾花嘅薑湯，跟身旁食友同感，就喺超辣 ；還好嘅喺兩大粒湯圓外皮搓得軟糯柔綿，煙韌唔黏牙，內餡唔喺咩大路嘢，而喺南瓜蓉及芋頭蓉，頗有新意 。
養生茶白玉丸子
22 views
0 likes
0 comments
整晚菜式賣嘅都喺講用料同精緻，而份量有啲偏少，猶幸食友嘅關愛，再送上多一碗湯烏冬俾小弟墊肚 。因為場地嘅問題，只能以長枱款客，傾偈亦只好跟身邊食友交談，而座椅重而一張拍一張，亦唔太方便出出入入，跟新知認識認識，跟舊雨打個招呼。建議開飯仝人再搞嘅話，可擺上幾圍大圓枱嘅菜館會更合適 ！
Post
