角落 三二 (Closed)

奧海城行完街，之後去大角咀搵嘢食，幾年冇黎大角咀，依家變到好似食街咁旺，睇到呢間有人排隊，二話不說就鎖定鳥。因為餓到一個點，所以餐牌入邊樣樣都想試。炸魚薯條沙律白身魚混咗調味先炸，香口唔死鹹，薯條係我最愛粗身個種，外脆內軟，沙律菜非常新鮮，配埋黑醋汁，清新醒胃。芝士流心蛋大啡菇配意大利飯鐵板上熱辣辣，咪睇個樣平平無奇，一切個大啡菇蛋汁爆出黎真心堅秋，意大利飯濕潤程度剛剛好，有咬口但唔會太硬。非一般的辣黑椒意粉配豬手真心！非一般的辣！程度似放咗半樽黑椒！同餐廳職員傾計，先知之前再辣一啲，已經聽取意見改良過，撇除辣意粉煮得好彈牙，不過豬手切片上份量略嫌少。蜜糖/韓式雞翼上枱嗰陣黑蚊蚊好似滷水雞翼咁，但食落充滿蜜糖味，好似用蜜糖醃左一段時間；另外韓式雞翼其實就係蜜糖雞翼上面加一啲韓式辣醬，原本以為好似 oppa 炸雞加韓式辣醬，同我想像中有少許出入，都係蜜糖雞翼好食啲。椰汁雪條菠蘿沙冰 & 冰蜜糖菊花特飲推！心機製作，跟餐只需要加＄25好抵飲。小本經營，睇得出好有誠意去提供食物俾客人，下次可以再試。