皇府 (Closed)

星期日，天晴。本想去跑馬地昌記嘆奶茶，撞啱佢休息，沿著成和道往山走，來到此店。記得太座說過年前幫襯過又一城嘅分店，叉燒質素是不賴的。是日胃口一般，捨叉燒而取粥粉麵。粥品點了皮蛋瘦肉粥($35)，呢個價錢是平均以上，不便宜。粥嘅質地軟綿綿，入口帶一點甘甜，加上皮蛋及瘦肉嘅鹹味，水準不俗，但是否值這個價錢，有商榷餘地。「粉」要了叉燒腸粉($30)及蔥花蝦米炸兩($30)，最大敗筆是出在腸粉本物，既不薄又黏口，十分差勁，令無論配上什麼餡料都失去原有風采。獨立嚟講，叉燒餡完全反映唔到招牌菜食神叉燒嘅鋒芒；炸兩炸得很香口，但略嫌單薄一點；灑在腸粉上的蔥花及蝦米反而出奇地惹味，適當發揮了其應有功用。「麵」是水餃麵($38)。先論湯，味道偏淡，冇大地魚嘅鮮甜味；麵條本身十分彈牙，明顯是鹼水嘅功效，可惜過猶不及，細啖食還可蒙混過關，大啖一點已能感受到淡淡鹼水嘅苦澀味。每遇帶苦澀味的麵條，二話不說，是一個交叉了。水餃餡料中蝦與豬肉嘅比例大概是六四之比，蝦肉豬肉味也是半桶水，質素一般而已。一餐晏連茶芥就洗咗一百五十三蚊，平均每人七十七蚊。其燒味質素如何，容後再試；論粥粉麵，去對面街嘅蓮園，忍受一下老闆娘嘅