千口甘甜品屋 (Closed)

與madam於譚魚頭打完邊爐之後，一夥兒往大坑一帶食甜品，順道與madam視察大坑一帶嘅居住環境，為計劃中嘅遷居做吓功課。月前試過了「小甜谷」，味道一般，這一次試了鄰近嘅「千口甘」。此店名將「甜」字拆開，有點創意。甜品方面，主力係由台灣傳入嘅雪花冰。雪花冰可配搭各類生果或珍珠/Q果等煙韌東西。筆者得店員極力推介，選了椰子雪花冰($32)；madam則叫了士多啤梨雪花冰($32)；太座因為要戒口，唔可以食咁多凍嘢，只可以食什果大菜糕($16)。椰子雪花冰果然冇介紹錯，入口充滿椰子嘅香味，有如食緊椰子雪糕，只不過冇落(或減了)奶而已，而且份量十足，如一座小山丘，與友人分享也可。至於士多啤梨味嘅雪花冰，效果差天共地。士多啤梨味不濃，部分雪花冰冰太多，而且味道有點人工，如以前甄占記嘅士多啤梨味雪糕。太座嘅大菜糕裡加了黑珍珠，味道索然無味，要靠芒果汁調味。各種生果配料都係冰涼新鮮，果汁豐盈。店舖位處民聲背後，半街邊檔。大熱天時，坐在外邊都幾辛苦，還好部分座位受有限嘅空調作調節，會略為舒適。店員勤力，態度誠懇，值得鼓勵。