夜上海 (Closed)

過年前公私兩忙，搞到完全冇預備開年飯。年廿九先上OP search 尖沙咀飲茶逐間打去問，啱心水時間又有位嘅情況下揀咗“夜上海”。7個大人1個細路，叫咗15樣點心小吃加1飯1年糕，啲嘢嚟得好快，加上冇乜特別，有幾款冇影相。大家一致認為炸春卷熱辣辣又香脆最好味；煙鴨有好香嘅燻味、黃橋燒餅外皮鬆化內裡肉鬆軟熟、牛肉餡餅外皮脆裡面牛肉多汁帶微辣都係水準以上。其餘美極炒腸粉(2歲嘅姪女自己另外食咗一碟)、燻魚、蝦餃、燒賣、蟹粉餃、牛肉球、叉燒包、福建炒飯、上海炒年糕都唔錯。花彫醉雞冇酒味、海蜇蘿白非常普通、高力豆沙唔夠熱蛋白唔夠鬆就爭啲啲。部分服務員有啲游魂咁。不過冇折嘅情況下都係$220一個人(姪女當半個計)幾抵食。