新麻蒲 BBQ (波斯富街) (Closed)

一直知有新麻蒲bbq，不過就開左咁耐以黎都未食過，今日收工後咁啱自己一個就決定試下一人獨食韓燒。一個人當然要食燒肉滿足自己，睇下餐牌決定牛同豬各點一碟。點完後店員首先送上前菜，前菜老有幾多款色又全部都係蔬菜類可以減輕下獨食燒肉既肥膩感。前菜有沙律，海帶，泡菜，洋蔥，豆芽，醃蘿蔔。沙律醬黃黃地帶少少碎食落口先知原來沙律醬加左粟米蓉，第一次試咁既沙律醬配搭味道好清新香甜又唔會寡。新麻蒲秘製牛肋排上盤見到已經好吸引醃好左既牛肋排上仲有層醬汁係面光鮮，牛脂唔算多燒好後入口軟淋多汁帶甜香味，後來放係生菜包住黎食減底油膩感。豬護心肉係餐廳主打之一見到餐廳掛上既海報都係推護心肉，試左一啖後肉質口感彈牙唔會鞋口之餘又易咬開，入口唔會太油，一個人都可以清晒。