Muse Furniture Lab (Under Renovation)

呢間cafe最近翻新咗，位置有啲偏僻，喺西鐵錦上路站再搭巴士入去。留意返食之前一定要book位先，同埋冇得揀坐室內定室外。我哋就係大熱天時被安排坐室外嘅幸運兒，食到滿頭大汗，怕熱嘅就等天氣涼啲先嚟喇。大熱天時緊係飲凍嘢，推介呢杯櫻花白桃梳打。真係有朵櫻花，仲要喺嚿冰入面，啱晒打卡！白桃切成一口size，加埋有氣梳打，爽呀！頭盤章魚燒同煙三文魚沙律，兩樣都好足料好好味，不過沙律可以再落多少少汁。主食揀咗烤雞肉配車打芝士法式可麗餅同蒜片辣椒欖油大蝦意大利粉。平時我鐘意食甜嘅可麗餅多過鹹嘅，但呢個有驚喜，又靚又好食，餅皮夠薄帶少少焦香，雞肉夠嫩有咬口，再加埋芝士，味道更加提升。而個意粉好啱我呢啲鐘意食辣嘅人，唔食得辣就唔好揀呢款喇。蒜加辣好香口，睇落冇咩汁，但原來好夠味，蝦肉好爽👍🏻最後甜品係歌劇院蛋糕。賣相幾有藝術感，仲有幾片金箔同花瓣，顯得有點兒高貴，又可以打卡，味道係濃郁嘅朱古力，唔膩，可以自己食晒成個。食飽可以行出室外，餐廳整咗幾個setting畀客人影相，又食又玩幾值得咁遠水路入嚟。