茶A (Closed)

好耐冇去粉嶺，太座今日要攞衫俾人，兩公婆順便喺名都商場逛逛，行吓行吓原來都到咗下午茶時間，見到呢間茶餐廳裝修得咁新派又光猛，唔會令人覺得有黑媽媽污糟嘅感覺，決定入去試試！“鮮茄燴牛脷飯”牛脷夠腍冇騷味，茄汁甜度適中，送飯或意粉一流！“乾炒牛肉意粉‘’牛肉唔過火夠嫩，重點係唔太油夠乾身，好多餐廳炒到成碟都係油，食到人口都歪埋，呢度算唔錯！“瑞士雞翼”做得好出色，唔會太鹹，味道剛剛好，雞翼亦都啱啱熟超嫩，瑞士汁好入味，令人食完一隻再一隻！最後茶記重點嘅茶膽，凍檸茶飲落冇澀味，真係好怕飲到澀嘅紅茶，所以呢度係合格！總結價錢合理，味道唔差！