張公館

Open Now

Now Closed

要過年啦，家姐話請我食好嘢，book咗哩間高檔中餐廳。餐廳裝修得古香古色，今日晚市full曬，好旺。一座低會送上兩小碟小食，藠頭酸脆爽口，花生酥脆好味。茶壺會用蠟燭護住溫度，幾有心。鐵板西班牙叉燒，叉燒好大一件，用鐵板裝可以一直keep到溫度。叉燒肥瘦均勻，入口微甜伴有少少焦香。肉質軟嫩唔柴，底下花生用鹵水煲制過，食落鹹香軟糯。香炸蝦棗，蝦肉錘打做成丸子，再落油炸。蝦棗表皮焦脆，內裡鮮甜彈牙，再點埋搭配嘅酸甜醬汁，食完一個好飽肚。豬油渣大地魚粒炒菜芯苗，用大火爆炒菜芯，炒得好有鑊氣。菜芯鮮甜脆口，再加埋豬油香味，好味。櫻花蝦脆米海蝦炒飯，配料好豐富，有蝦仁，帶子，菜芯等，最得意係落入鍋巴同櫻花蝦。飯炒得粒粒分明，海鮮增加咗鮮味，鍋巴豐富咗口感。生磨蛋白杏仁茶，用個荷花碗裝住，好靚。杏仁味道好香濃，飲落唔會好甜，反而好清爽。下麵仲搭配埋少少杏仁凍，甜品黎講好滿足。