il Bel Paese (皇后大道中) (Closed)

平時返工多數帶飯，但聽同事講皇后大道中有間餐廳做緊Promotion，$60就食到Carbonara，即刻約埋附近返工嘅朋友去試下。之前經過呢間餐廳幾次見到裝修幾靚已經想試，不過Lunch至少百幾蚊，所以一直遲遲未行動。今次呢個crazy carbonara week用$60就試到，實在無唔食嘅理由！我同朋友各自點咗一份Carbonara，等緊期間店員送上餐包，非常Surprise，無諗過$60價錢仲有包送。雖然橄欖油同醋偏苦，但都為胃打個底先。主菜終於上場！睇上去非常細份，但其實食落你會發覺以我一個咁大食嘅女仔嚟講都非常飽。平日街食carbonara偏向多汁同用煙肉，但你睇得出餐廳係用靚料去做sauce所以成個意粉每一口都非常creamy。而意粉亦用上al dente，除咗較幼身之餘，外面偏軟，中間一點半熟不生，令到每啖都勁有咬口。埋單連加一每人都只係需要$66，喺上環區高級餐廳食到呢個Lunch實在超值。