來佬餐館 (Moved) New Location

美籍同學來港探訪，因為佢只係鍾意食牛扒，同友人商量後決定帶佢去「來佬餐館」食港式西餐。小肥最驚排隊，所以早一個星期就想打定電話訂枱，點知接線生話只接受最少六個人會到齊o既booking，其他客人先到先有位，更要人齊先會安排入座。勢估唔到我地當晚七點正到，直到我地食完離開，不但冇見過人龍，餐廳吉位重超過50%。唔知係咪響應特首25度呢，室溫熱到好似冇開空調咁，覺得我地好煩o既哥仔幫我地加大左兩次冷氣，我同同學仔兩個D汗都冇停過，飲極冰水都降唔倒溫。　 磨菇忌廉湯（$38）：忌廉湯和暖，味道正常。不過跟湯個餐包就出左事，又乾又涷，食落口直頭覺得來佬有少少趕客囉；同太平館個熱辣辣，又香甜又軟腍o既餐包簡直係無得比。　 來佬汁雞翼（$88）：雞翼微暖，肉質嫩滑，來佬汁同瑞士汁極為相似，味道同樣香甜。如果佢夠新鮮熱辣，我一定會比返隻手指公佢。　 黑松露安格斯牛柳粒炒飯（$108）：黑松露香味欠奉，牛柳粒偏乾同韌，唯一可讚o既係炒飯夠乾身，一D都唔油膩。　 香蕉班戟（$38）：班戟皮口感唔錯，可惜唔熱唔涷，好似超市買完擺左出黎好耐咁，唔夠新鮮。 總結，食物水準偏低，但價格就偏高，唔抵食指數當然亦對