誠拉麵 (Closed)

放lunch黎左Aeon搵食，同事話想食日本野就走埋去壽司櫃哄下啦，原來埋邊有位坐可以堂食，呢個堂食位係拉麵店同壽司店共用，見完之後轉場去左食拉麵，哈哈，始終呢啲難外賣嘅梗係有堂食開心啲啦。同事叫左拉麵加叉燒飯嘅套餐，有汽水送。拉麵有分（特）同（正），特就係多啲餸嘅豐富版，同事要左正黑豚骨拉麵。試左一啖同事個湯底，呢個黑蒜油湯底味道濃郁，好香又唔過鹹，好味噃，我見同事飲晒成碗，哈哈。仲有細叉燒飯，用上珍珠米，連埋叉燒啲肉汁又幾好味。我就叫左拉麵加餃子餐，夠㗎啦，食唔落太多。同樣選了正拉麵，口味就揀左白豚骨，賣相不錯啊。湯底濃郁，飲落有少許黏口，不死鹹啱口味。麵條掛湯無鹼水味，份量屬大幾大碗下。叉燒半肥瘦，軟腍，入口甘香不肥膩。溏心蛋好流心，但我覺得略略鹹左少少。轉成套餐加了餃子同汽水，餃子揀了三只份量，煎得香口好食。原本套餐仲有日式沙律，不過個日賣晒，我同同事趕時間就廢事等了。