有間客棧 (Closed)

太耐無食中菜，今晚決定嚟呢度食返餐。我哋兩個人點咗份二人餐，雖然話係二人餐，不過份量都好多，三個人都夠食呢我哋叫咗蒜泥白肉、涼拌青瓜、酸菜百花鱸魚片同埋紅燒肉。店員主動同我哋講話有唔同辣嘅程度，可以叫BB辣就唔使怕太辣食唔到啦～不過兩碗飯我哋驚太多會食唔晒，所以同店員講要一碗就得啦～先上菜嘅係蒜泥白肉同涼拌青瓜，切成薄皮嘅豬肉片，配搭埋醬料，好彈牙呢，而涼拌青瓜爽口清涼，啱晒做晚餐嘅開胃菜。之後上嘅係酸菜百花鱸魚片，因為鱸魚本身都好少骨，加上肉質肥美，啖啖魚肉，好正呀～而且配料仲好豐富，有寬粉、雲耳同豆腐卜，夠曬入味～而紅燒肉雖然睇落好似好肥咁，但係食完一舊之後，會好想繼續食，嫩滑得嚟仲有彈性，餸飯就啱晒啦～