麻痺雞 (Closed)

同大埔友團年，近近地去咗大埔墟食雞煲，估唔到六點幾已經滿座，好彩最後一張枱都俾我哋坐到，全場免加一，雞煲一個價錢已經包埋任食火鍋，咁抵食唔怪得咁快 full 啦!海鮮雞煲 $178/位，海鮮有生蠔、青口、魷魚。雞件肉嫩多汁，最鍾意就係雞肉掛滿麻辣汁，味道香辣又刺激，辣得好過癮。食辣雞煲梗係要飲冰涼嘢啦！鴻福堂嘅百香果蜜，消辣解渴。除咗雞煲，仲有幾款餐前小食好正，全部都係川式涼菜，青瓜、海蜇、黃金皮蛋，好食到停唔到口。食晒雞煲就可以加湯打邊爐啦！ 基本牛肉、豬肉、丸丸、同埋魚皮都係我哋嘅最愛。我哋仲加錢要咗個即炸響鈴 $48，熱辣辣鬆脆無比，不過就真係要等好耐，記得一坐低就要 order。令一碟加料就係 手切安格斯肥牛 $168，大大碟肉色有光澤，肥瘦均勻，入口柔軟飽滿結實，滾兩下就食得。每人唔使$200已經可以大吃大喝過肥年，下次想喺大埔食雞煲我都會再嚟幫襯。