隱世貳館 (Closed)

之前同朋友食過呢間隱世貳館—只係睇個名，又真係唔知佢係賣咩。原來係間自助串燒餐廳，由於一到夏天就係BBQ既好時節，我唔搵BBQ，BBQ都會搵著我。(雖然我真係唔明白，唔熱唔燒呢個概念係點黎)呢到既選擇都唔少，平時B開既野食都會有，肉類總係離唔開丸、雞翼、扒同多春魚。菜蔬類就有菇、茄子。而講起串燒既生果就一定係燒菠蘿。等左半年先黎既第一次BBQ，當然要要B返夠本，於是，我地幾乎燒勻哂咁多款野食。不過講野食之前，差D唔記得講飲品。對於長期處於火堆附近黎講既我地，補充流失既水份係相當重要。而呢到飲品選擇都幾多，同放題差唔多，總揀到枝岩你心水。另外，呢到仲有錫紙、紙盤同餐具提供，同自己BBQ咁差唔多，不過自己咩都唔洗拎，又唔洗頭痕買咩、咩野買幾多好，方便度同舒適度真係多好多。講返野食拉，肉類食物都醃得幾入味，班食肉獸都食到好開心。而丸類既質素都唔差，開頭幾驚係粉丸，好彩丸又幾彈牙，味道又正常。而多春魚真係每一條都脹卜卜，咬落好有滿足感。