Dodam Chicken (利舞臺廣場)

Open Now

Now Closed

今日星期日，我同朋友係專程嚟呢度食韓式炸雞嘅。話說食過另一間炸雞，大感失望之後，就想搵返一間高級小小嘅平衡下心理。大概三點嘅時間餐廳冇乜人。⬇️落完單之後，好快職員就送上左手套。以往嘅經驗係，用完都係會穿，唔穿一樣會有味道，所以不如就環保少少用刀叉同埋夾食。⬇️我哋點左個香甜辣脆雞（$192），差唔多係一隻雞嘅分量，足夠兩個人做午餐。個皮首先嘅感覺係甜，至於辣味係越食越有，另外面頭亦都佈滿蒜頭碎，相當惹味。炸雞完全佈滿醬汁，少少死角也不漏，開頭食嘅時候仲食到脆卜卜嘅雞皮。⬇️必須讚一讚佢雞肉嘅質地，係有質感彈牙嘅雞肉，有雞味，雞肉唔太多脂肪，亦都保留着肉汁，絕對唔係連鎖快餐店乾到一絲絲嘅擦膠雞肉咁嘅質素。食到最尾濟濟地仲可以加少少檸檬汁中和一下油膩嘅感覺。平時可能未必會比呢個價錢去食炸雞，但係食完今次之後，終於明白係一分錢一分貨嘅道理，炸雞都可以值呢個價。