MooFish (Closed)

放假嚟到大嶼山探朋友，點少得入去愉景灣行一轉，chill下relax下呢！呢間餐廳嘅位置係近沙灘嗰邊，本身想去食zaks，但zaks嘅外圍落晒帳幕，好昏暗，享受唔到陽光。所以上咗去一樓嘅Moofish，同zaks都係同一間公司。上到去嘅環境同樓下完全唔同，上面以白色同藍色做主調，側邊全部都係玻璃窗，光猛開揚好多。我哋被安排坐窗邊位，好開心呀！我哋叫咗set lunch，揀咗沙律同埋main course，沙律係去自助吧自己拎，但只可以拎一次，要再出去拎嘅就要加錢。沙律吧啲食物都幾好味，除咗沙律菜之外，仲有煎雞胸、炒椰菜花飯、烚蛋等等，顏色望落去都好豐富㗎！之後到主菜，我哋揀咗煎牛扒拼薯條，薯條好出色，炸得好脆口好好味，唔使點茄汁都好好食！但塊牛扒就有啲失色啦，好薄身，又煎得好乾，唔夠肉汁，識落有啲韌同埋多筋！不過呢度嘅環境實在太正，望到沙灘，又見到藍天白雲，所以補返數啦！