DKLM Bar & Restaurant (Closed)

放工後想搵一個地方可以食dinner又可以同三五知己chill下，所以就黎到位於金巴利街嘅DK Bar。雖然係尖沙咀好隨意都可以搵到間bar restaurant ，不過呢度嘅好處就係環境比較悠閒，唔會有好嘈嘅音樂，反而係岩幾個朋友飲野傾下計咁，好自在。唔算太肚餓，所以主要就點左幾個小食同cocktail。DK Bar有任食蝦片，脆卜卜又大塊，店員都主動fill到好滿，我地一晚差唔多食左三四兜...🙈粗直炸薯條（加黑松露醬$10 ）🍟炸薯條新鮮熱辣辣，外皮好脆仲見到有啲番薯皮痴住，醬汁分別有黑松露醬同茄汁，個人覺得黑松露醬雖然好香濃，不過都係點返傳統茄汁襯啲。水牛雞翼🍖水牛雞翼賣相好靚，面頭再加左啲燒汁，炸粉唔會好厚，旁邊嘅醬無點過，因為雞翼本身已經好夠味。滷水鴨舌(原味)👅要數到伴酒嘅小食一定會諗到滷水鴨舌。滷水好入味，份量都多，最緊要方便食，傾下飲下酒好快就清晒碟鴨舌。飲品方面就嗌左一杯cocktail 同 一杯shooter ， 佢地嘅signature cocktail都好多選擇。餐廳happy hour去到9點，隨即都會有live show聽，以後放工叉叉電又多一個選擇。