Holy Chef (Closed)

適逢Happy Friday, 最啱嚟到呢度chill out relax下。位置不難找，但距離長沙灣地鐵站要10分鐘路程，轉角會遇到Holy Chef。店子只有約20個位，坐得ok舒服。Menu上嘅菜式都唔多，每星期都可能有唔同，但專點推介嘅準無錯！首推左下角碟南瓜煙肉意粉，好creamy好rich, 個醬味道好特別，有南瓜味、蛋黄味，啱哂重口味人士！啲煙肉肥肉部份好有咬口，煙煙靭靭好有趣！其次係右上嘅招牌拉長長cheese三文治，紅卜卜嘅外型原來係紅菜頭嘅化身，三文治脆身唔太燶，不過略嫌偏乾。Cheese都夠重口味，再double cheese都仲得呀！每個主菜都會送杯的骰杯子蕃茄湯，直情係一試難忘！好濃郁嘅蕃茄味，好似濃縮咗一個蕃茄落個杯度，唔酸較甜，仲有啲茄肉，力推！後記:對呢度枱枱凳凳，甚至杯杯碟碟都好喜愛，有啲杯子可以喺香港買到，有啲就係老闆專程邊去旅行邊搜羅返嚟，真係心心眼！