FRITES Belgium on Tap (曦巒) (Moved) New Location

之前試過Frites嘅招牌青口新鮮肥美，今次encore試下其他口味。我同朋友貪得意揀左喇沙味，食落香茅味突出，加入椰奶更creamy~青口依舊鮮味十足，配上薯條和Sourdough麵包，適合同幾個朋友分享。薯條炸得黃金香脆，咬落粉腍，蘸點蛋黃醬很好吃！凍蟹餅由蟹肉、牛油果、毛豆、西芹等材料疊成，食嘅時候將所有食材拌匀，再放上麵包脆片。蟹肉鮮美但略咸，以檸檬油醋汁調味，整體清新不膩，作為前菜開胃不過。今次留意到有Vegetarian menu，素食漢堡用黑豆做漢堡扒，無論賣相同質感都呃得下人，食落好有飽足感！加上煙燻芝士、燈籠椒、洋蔥圈、檸檬蛋黃醬等配料，味道濃郁，十分惹味。沙律材料非常豐富，包括藜麥、野米、紅菜頭、西蘭花、牛油果、粟米等健康食材，配上油醋汁酸酸地好醒胃。甜品叫左Sticky Date Pudding，蛋糕綿密鬆軟帶有濃郁椰棗香，加上butterscotch醬同cream一齊食，鹹鹹甜甜層次分明。原來呢間餐廳已經開業十週年，能夠係香港屹立多年當然有其過人之處。