九運來粉麵世家 (Closed)

放工約咗同個老友飲返幾杯。但係飲之前都要食咗正餐先。不嬲都知厚福街好多嘢食，我哋就過去行下，見到呢間新開冇耐嘅粉麵店就去試下。呢度最出名係崩沙腩，但好可惜我哋去到嘅時候已經冇晒，大家想試真係要下次趁早！店員推介我哋試吓牛坑腩，又即管試下。一碗都成5,6舊，而且真心好食，完全冇臊味，又唔會煮到好靭到食橡筋咁，但又唔會冧到一駝野咁，口感一流，果然無推介錯。而個河粉底都好唔錯，我至鐘意佢咁爽口又大碗。而另一款我哋試咗黃金片頭拼雲吞米粉，一碗有3大舊片頭3大大粒雲吞，CP值勁高！而雲吞都讓我喜出望外，勁多餡，皮又薄。碗米粉仲要勁大碗，最後尾都係食唔晒細食量嘅女仔可以考慮叫扣底。因為我鍾意食辣，我哋就試埋個麻辣魷魚鬚小食。算係涼拌小食，啱晒而家呢個天氣！估咁到一碟份量咁多，一座小山丘咁！魷魚鬚勁爽口，加上店家親調嘅麻辣汁好惹味，又唔會麻得制食到個人好辛苦，極度推介！加埋碟生菜，滿足！呢度坐得舒服，而且比好多粉面舖乾淨，每樣嘢都好大份量，回頭率好高！